“Kiban ka Teknik Meusén njoe ?”, njoë munoë keuh sabé-sabé tutô njang teuba lam ulèë lôn, mungkén tjhit keuë padum-padum droë mahasisseuwa njang laèn bak djôrôsan Teknik Meusén Universitah Sjiah Kuala njang meunjum bak geurasa peuë-peuë manteng njang ka sabôh pakat tjhit lagèë peuë njang ka lôn tuléh bak awai peunulèh njoë.
Meukalèn bak nubuët, kri seumiké, kri meuoganisasi, tingkat tjareng individuai, ngon padum-padum boh alasan laén njang mungkén jéh that tapeudjeuët sibagoë saboh alasan. Geutanjoë mahasisseuwa Teknik Meusén djinoë brat that ka djitrén kri bak djak kulijah atawa kri bak mita eleumèë. Tjukôp that hèk bak ta teubak peuë hai dasai njang jeuët keuë seubab-meusabab sampoë geutanjoë djinoë jeuët lagèë njoë ban. Dan deuëh pih padum-padum droë gurèë njang meuphôm hai njoë, teuma njang laén lagèë hana meu’oh ban. Padum droë gurèë njang meuphôm njan geurasa tjhit bahwa keudaan djinoë meupeukeuë u arah njang hana ta harap.
Padum-padum droë gurèë njang tom lôn ikôt kulijah sajan geuh na geupeugah bahwasajih ka pajah that lawét njoë geupeureunoë mahasisseuwa, mungkén njoë na meusabab ka kureuëng niët meureunoë nibak haté mahasisseuwa djinoë munjo ta peubandèng ngon mahasisseuwa njang ka ka, mahasisseuwa jôh watèë masa Teknik Meusén Unsyiah njoë ban-ban djeuët dilèë. Djeuët tapeugah awak awai djitém meureunoë dan tém lét gurèë, seudang masa djinoë ka hana lé meunan.
Lôn teuingat na sidroë gurèë lam glah kulijah tom geu kheuën bèk sagai-sagai meubuët dari up to bottom, tapi tji meubuët dari bottop to up. Arti jih peu teuma ?, njang geuteuntôt djeuët sibagoë tangông djeunaweuëb sidroë-droë mahasisseuwa nakeuh beuleubèh peuka dan beudiwasa kedroë djih dan keu ureuëng disampéng djih. Njang djeut sibagoe bottom disinoë nakeuh mahasisseuwa, seudang up djih nakeuh gurèë. Up to bottom meusurah gurèë njang djeuët keu ureuëng peu phôn, leuëh njan geupakat mahasisseuwa geuh seutèt gobnjan, njoë keuh peukara njang paléng that geupeubèk. Bottom to up meusurah mahasisseuwa njang djeuët sibagoë moto peuneudjak dan gurèë njang djipakat beusaban-saban peusuksèh sabôh buët njang keuneut djipeugot, njoë keuh ban njang brat that geuprèh-prèh. Mahasisseuwa geupeuwajéb tjok seureuta tjhit bak buët bi eleumèë, idé, peungalaman, seureuta peuë-peuë manténg njang positéf.
Perlèë ta ingat bahwa peudèng bansa nakeuh tangông djeunaweuëb geutanjoë bandum, njang hana leuëh tjhit dari tangông djeunaweuëb mahasisseuwa. Lon teuingat watèë bak njan na sidroë adoë letting njang lôn lakèë bak djih keu ikôt sabôh éven lumba meuwakili Himpunan Mahasisseuwa Meusén. Lagéë njoë kureuëng leubéh lôn lakeë, “Adoë, peu tém ikôt lumba di BEM Fakultah siat ?”, golom didjaweuëb peuë njang lon tanjeng, djitanjeng balèk bak lôn lé djih, “éven njan keu mita soë djwara njeh Bang ?, lôn peugah, “nje”,’ han ék lôn Bang, hana hajeuë !”, didjaweuëb lom lé adoë njan. Leuëh njan lôn tanjèng keulai peuë alasan, djiseuôt,”lôn kureuëng galak meunjo éven djipeugot keu mita djwara atawa soë njang meunang, lôn leubèh galak peuneuget lagèë teumuléh PKM (Program Kreativitas Mahasiswa), seubab hasé njang tatuléh njan langsông djeuët tangui keu ureuëng-ureuëng geutanjoë, ‘oh leuëh njan tanjoë djeuët meunang ramè-ramè lom”, sira teubangai-bangai lôn piké njo tjhit lagèë adoë njan peugah. Sampoë bak watèë njoë mariët adoë njan that brat manteng meubeukaih lam ulèë lôn, seubab hana teuduga meubatjut pih djeunaweuëb djih djeuët meubalék lhèë reutoih nam plôh deuradjat lagèë njang lôn kira.
Solidaritah geutanyoë keu soë ?
Tapi seubeutoi djih ken masaalah lumba keu mita soë njang meunang njang keuneut lôn peugah disinoë. Peuë njang djigalak lé sidroë mahasisseuwa yang kaleuëh meupeugah diateuëh bunoë nakeuh sabôh pola piké njang brat that paih keu djipiké tjhit lé mahasisseuwa njang laèn. That perléë sabôh sikeuëp lé mahasisseuwa njoë beuleubèh diwasa bak peuneubiët inspirasi, hana leuëh nibak tangông djeunaweuëb deungon studi, djih na tangông djenaweuëb tjhit sibagoë peuneudjak roda bansa njoë u arah njang leubéh get. Paneuk haba, mahasisseuwa njoë pajah djeuët seumiké kiban kri djipeugot droë djih ngen ureuëg laén keu djak ukeuë mangat hana lagèë njoë sabé–sabé .
Peu njang ka keujadèan lawét njoë, rata-rata mahasisseuwa kureuëng djipeureumeun ngen hai-hai meunan, hasé djih na keuh diteubiët éstilah kupu-kupu (kuliah pulang-kuliah pulang – basa Indonosia). Hana salah tjhit munjo tameusikeuëp lagéë njoë kri, djak kulijah mita eleumèë, leuëh njan woë u rumôh meuulang beujeumet, dan ‘oh bak akhé meurempok indeks prehtasi njang got tjhit. Nibak njang umum, mahasisseuwa njang lagèë njoë peukateuën nakeuh ureuëng-ureuëng njang seubutoijih tjareng-tjareng dan tjeudah-tjeudah, dan meunurôt lôn tuan tjukôp that sajang meunjo mahasisseuwa njang lagèë nyoë rupa leubèh tém piléh piké keudroë manteng dari pada didjak piké peuë laén njang meunurôt djih hana guna, miseuë djih meuoganisasi atawa peuë-peuë manteng njang hana meuba untông keuë djih.
Padahai meunurôt lôn kalen, mahasisseuwa yang tjeudah njan na kapasitah njang leubèh got bak sumbang idé. Peunjan sabôh idé peunelitian keu program DIKTI njang djeuët peuneugot droë djih na jum leubèh lagèë program PKM, PHBD, dan sibagoëdjih, atawa idé-idé njang jroh laén njang jeuët djeunaweuëb peuë-peuë manteng njang djipereulèë lé ureuëng ramé, meusabab idé-idé njan hana jeuët djipiké lé gob laén meutapi nakeuh djeuët djipeubuet atawa djipeulaku dan djipeunjata lé le ureuëng laén blah oganisasi mahasisseuwa. Tji geutanjoë piké siat djinoë kiban njang jeuët ukeuë meunjo ata njang meunan na lam pola seumiké mahasisseuwa geutanjoë. Idé njang got dan djitém peubuët njan tjukôp that meujum keu ureuëng teurimeng peuë lom ureuëng njan kadang tjhit teungoh that geupereulèë, peu lom geuteurimeng dari aneuk inong dan aneuk agam Atjèh, kiban keuh seunang haté ureuëng njan munjo njang lagèë nyoë ban tapeubuët. Tji piké lom harôm nan djôrôsan, fakultah, dan universitah bak mata ureuëng, dan kateuntèë meutamah lom poén bak BAN-PT dan DIKTI. Njan gohlom njang djirasa lé mahasisseuwa njang tém bi idé dan rakan-rakan djih njang tém peubuët entreuk ‘oh watèë kaleuëh kulijah bak mata peurusahaan-peurusahaan njang wawantjara, beuthat pih kadang utak djih hana that tjareng bak djaweuëb soal tèh, meutapi paléng han djih jeuët didjaweuëb watéë djitanjeng, peuë njang kaleuëh kapeubuët lé droë keuh seulawét njoë ?. Na keuh hai-hai njang lagéë njoë njang jeuët keu jum leubéh sidroë mahasisseuwa bak mata peurusahaan.
Lé that nubuët njang jeuët peugot geutanjoë leubéh, maju, seunang, atawa djituri lé gob, munjo sabôh idé njang ubit djeuët djipeubuët ngon niët njang got, jroh, meususôn, dan meutanggông djeunaweuëb. Teuntéë peuubah njang meukualitah pih that brat toë dikeuë mata. Neupiké, dan neupeubuët ladju djinoë !.
